有一段時間無擔當過樹洞嘅角色，今次仲要打孖嚟。聽下聽下，咦，好似講緊幾年前嘅我，只係對方比我更勇敢，更光明正大。最後我唯一可以講嘅就係，放低仇恨，同埋睇開啲。

然後我又記得，根本當事人要做到呢兩件事係好鬼難，除非有另一個更大嘅污點去遮住呢個污點。然後等時間過，環境轉，人事變，先發現自己同對方都只係一粒small potato，點解自己會用咗咁多精力嚟搵一粒small potato有幾爛。對自己同對方都唔公平。然後有啲想搵個窿塞個頭落去。我曾經眼裡只有你，當你離去，藍天白雲

放低仇恨，睇開啲喇。

Here I am, to pursue my dream.

開學剛剛一個月多少少，一個唔小心下星期已經係Basic Certificate考試。過去一個月要適應新環境，每日唔係返朝八就係放晚九，大概上6－9個鐘堂，的確有精神崩潰嘅時候。不過望下啲製成品，就知道努力係無白費。

我都想不停地係呢度keep住update自己嘅進度，無奈申請左broadband成個月，駁好又壞又再整，就搞到我成個月過左石器時代嘅生活。對住手機打blog又會壞眼。

石器時代係誇張左，一星期返足五日學 + 有限上網 + 放學返屋企開電視等睇卡通片(Family Guy) + 有食早餐先出門口，小學時代好似貼切啲，好似係。

你見到可能會話：嘩次次都成日個拎番屋企食，咪好開心囉？係開心，但係當你每日都有practical，每日都拎個8"蛋糕返屋企，而朋友同自己都唔多時間係屋企食，就會成為一個嚴重腦交戰。好努力堅持每日食一件，食足四日，最多都係清到大半個；according to food safety，淨番果小半個已經雪到乾乾地/淋淋地，實在唔應該再食，但係唔食又大嘥鬼，但係雪櫃又無位；有時剛剛整好kitchen porter又唔收事關太多人giveaway，夜媽媽又唔知拎去邊度派 (有時早放派俾露宿者就非常實際嘞)，腦交戰無限loop，應該要loop足半年。

矛盾

Essay、Dissertation寫得七七八八，要開始為唯一一個考試準備。溫書－其實即係思考人生嘅另一個形態。

從前有一位朋友，我同佢唔係識咗好耐，但係剛認識果排我真係有種他鄉遇故知嘅感覺，皆因大家好似都鐘意聽人山人海嘅音樂，我又硬係成日睇穿佢諗緊咩，一擊即中。我以為generation gap唔係我哋之間嘅隔膜。直到一日我分享咗一樣我做嘅嘢俾佢睇，然後換來一句「你就係做啲咁嘅嘢呀？」，就將盲點破壞。的確generation gap唔係隔膜，而價值觀先係問題。你可以話我做得唔好，可以有意見，但係唔可以藐視我嘅努力。

後來佢再次質疑我嘅選擇，我就決定我唔要再主動同佢講嘢。

後期我諗番佢曾經講過嘅嘢，我先醒起價值觀gap早已存在，我只係被「他鄉遇故知」呢件事蒙蔽雙眼。剛才再上網望下自己個星盤，先發現自己思考時偏向用情緒控制理智，到深層理智開始(被)啟動時，就會將曾經衝動嘅行為反覆思考，再作一個終極嘅結論。我將雙子座嘅自相矛盾、忽冷忽熱，同天蠍座愛恨分明推到極緻。好遲鈍。