原來擁有一把咁上下利嘅刀真係好重要。兩年前因為貪平買左把平價Wilkinsons菜刀，切蘿蔔都有困難，最後被刀背刮番損，手腕又痛。然後頂唔順就買左把貴少少，係人用嘅刀。

但係當一個成日目光放空、粗心大意、又好鐘意將啲菜切碎先煮嘅人配合一把利刀，真係好危險。人總要犯重複的錯誤。回想起四月，我切高麗菜

切得太興奮，就切親左手無名指，自此之後我都無再買過高麗菜了。

事隔半年，上星期日，我切洋蔥，就切親左手手指公。尋日換結他弦，竟然被結他弦刮傷埋左手食指。買左好多年都無乜點用過嘅膠布，一時間數量急降，要捱到完全復元似乎有啲危機。用手機要單手打字，好唔方便。我真心覺得自己好廢，都好嬲自己咁智障，我以後都應該睜大雙眼切菜同換結他弦。

我究竟一個月後會淨番幾多隻完整嘅手指頭呢？我依家仲有八隻。

我一個人闖進了湖區

Lake District，呢一個好多人因為住得太遠而唔肯去嘅地方，偏偏我就半個鐘火車就去到。我每年都以天氣為藉口，遲遲都唔肯去，真抵死。趁deadline仲有排先殺到，都係拿拿林玩盡佢先，去闖一闖呢片未知嘅領域。

習慣了這裡一年四季陰陰沉沉的天氣，上天突然賞賜好幾天藍天白雲，反而令我有點不安。總是認為這光境只是暴風雨的前夕，或是地球暖化又嚴重了，所以天氣有點反常。想太多仍然是我的一個陋習。



應該相信自己眼前的，相信心裡所想的。