留學生食譜 ﹣ 韓式炒年糕

 

已經開學左近兩個月，Coursework死線即將殺到堆身，驚覺時間無多再加上外出食飯昂貴，所以又開始搵另類方法對自己個胃一點。如果大家有留意留學生食譜的話，或者會記得我大半年前整過韓式海鮮煎餅。我都仲係嫌製作過程太長，太多材料要買，海鮮又貴，最重要係我無大煎pan，根本就整唔到。

早前去到倫敦，再搭半小時火車拜訪「Korean Town」。地方當然唔及China Town熱鬧，但勝在真係好韓國，有唔少韓式餐廳、韓國超市、韓國診所、連韓國人補習社都有。價錢除左比倫敦中心平少少少少之外(除非大量入貨，否則價錢出入唔大)，就係有新鮮韓式食品。店舖自家製作嘅泡菜、小食，唔係雪藏嘅年糕等等東西一應俱全。若唔係因為怕行李重，我都會選擇掃個片甲不留，好讓死線前嘅日子幸福一點。不過最後只係買左一pack年糕同一盒辣椒醬。

材料：年糕十條，洋蔥半個，蒜頭三粒，燈籠椒半個(可以唔落)，蘑菇50克(可以唔落)

調味料：辣椒醬適量，糖半湯匙，水約100ml*(可以增減)
1. 切好材料



2. 煲滾水，烚軟年糕，需要約5分鐘。倒水，待用。 

3. 清潔好剛才烚年糕嘅煲，抹乾。落油，加熱至中火，放入蒜頭同洋蔥。
 
4. 洋蔥炒至半軟後，放入燈籠椒絲及磨菇，蓋上蓋子。
 
5. 三分鐘後，磨蘑應該縮晒水，煲底亦應該出現磨菇水。(幅圖蒙左，唔好意思)
 
6. 加入100ml水*同年糕，再加入辣椒醬同糖，拌勻。唔夠辣可以再加，太辣就再加水或加糖。
 

7. 上碟，隨便放上喜歡嘅配料。我係雪櫃搵到雞蛋同片裝芝士，趁熱放上芝士，再煎熟隻蛋就食得啦！
 

*我嘅製成品較為多汁，如果想乾身少少可以自行調較水嘅份量，當然辣椒醬同糖亦要跟比例增加/減少，最重要係自己試味試到岩口味為止呀。
我都係堅信新鮮年糕比起雪藏年糕更煙韌，但係要遂條分開，比較嘥力嘥時間，大家自行選擇吧。如果想落肉類，可以事先將肉炒熟再連同已熟年糕落入煲中。
做法既然咁簡單，多點下廚，減少食即食麵，對自己身體好一點吧！