留學生亂咁遊 - 火車篇

要係英國穿梭各大城鎮，可以選擇嘅交通工具有火車、旅遊巴士。遠程火車車費癲起上黎可能會超過60英鎊，如果無railcard就真係好溶。住得近機場的話真係可以考慮下搭飛機，分分鐘仲快/平過搭火車。
Railcard係咩黎呢？其實係一張專比16-25歲搭客申請嘅卡，持卡者買火車票可以獲得車費1/3off優惠。當然，張卡係要俾錢買嘅，一年28英鎊或者三年65英鎊。如果你好喜歡四圍去，其實好快就回到本。
因為火車票價錢太太太貴係一個無可能改變嘅所以事實，我決定呢一生都唔要因為自己嘅失誤而蝕俾佢⋯⋯

係英國第四年，先真正見識到咩野係大風雪，仲要係三月。英國西北部真係一個神奇嘅地方，真係冬天果陣又唔見你積雪，踏入左春天先黎積。我祈求聽日嘅火車服務正正常常，火車軌生生性性唔好結冰唔好cancel，你知啦，火車飛係幾咁貴架嘛。
又唔知點解 D風只向我住緊果座building吹，風就不停係窗邊攝入黎，然後我就好凍好自然就要開大個暖氣，點知間房又變到好乾好事我又開始喉嚨唔舒服，我想開個窗抖下氣點知根本就大風到我推唔開隻窗。我好乾呀呀呀
然後就好遺憾地發現我枝奶已經飲完，無奶即係無咖啡飲，無咖啡飲即係會眼訓，即係做唔到野。唔得咁頹廢架啵我要落街，順便寄封信。雖然我所住嘅building係非常極度方便(根本就專係比懶人住)，落去買野食、寄信、上堂、搭巴士、撳錢都只需步行2分鐘，而果2分鐘可能有分半鐘都係搭緊果架龜速升降機。我就係呢來回加埋一分鐘暴露於戶外嘅時間內，第一次感覺到被 風+雪攻擊嘅感覺 ﹣ 就係同時有雪同少量冰粒向自己塊面不停直衝。一定係有人用左windy之咭同snow之咭，懲罪我呢個懶到出汁嘅人。
我知道有人要係呢個天氣下行路返學，我都見到樓下有好多要工作人員係度淋緊雪。對某D人黎講，大風雪根本只係一件鼻屎咁細嘅事。能夠長時間忍受大風雪嘅人們，你地真係強！

留學生亂咁遊 - Stoke-on-Trent

兩個星期前嘅星期六，距離復活節假期仲有三個星期(也就是測驗/Essay死線的來臨)。係呢個尷尬嘅時間，有少少無聊，又覺得有野要做唔應該玩，最後決定搵朋友去玩。因為本人來自英格蘭西北部而朋友來自中部，所以決定打開地圖，於兩人之間選擇一個地方遊覽一日，咁就唔會太內疚又有得玩啦。
為免去錯過於荒蕪嘅地方，我決定用一個膚淺嘅方法揀 - 地圖上字體較大嘅城市，應該衰極有限掛。Birmingham、Leicester、Nottingham等等大城市，其實都係充斥住連鎖店，無乜驚喜。所以揀左Stoke-on-Trent挑戰一下。

對於「只可以揀冰水定攝氏55度嘅熱水」呢一個問題，又唔可以話好困擾，但係又間唔中影響到我咁啦。一般刷牙洗面都還可以將雙手做成一個兜，不停地快速地兜住冰水再去兜熱水再潑上面。洗mask的話，就真係唔好講笑。