diamnusable . food . travel . life : 留學生亂咁遊

兩個星期前嘅星期六，距離復活節假期仲有三個星期(也就是測驗/Essay死線的來臨)。係呢個尷尬嘅時間，有少少無聊，又覺得有野要做唔應該玩，最後決定搵朋友去玩。因為本人來自英格蘭西北部而朋友來自中部，所以決定打開地圖，於兩人之間選擇一個地方遊覽一日，咁就唔會太內疚又有得玩啦。
為免去錯過於荒蕪嘅地方，我決定用一個膚淺嘅方法揀 - 地圖上字體較大嘅城市，應該衰極有限掛。Birmingham、Leicester、Nottingham等等大城市，其實都係充斥住連鎖店，無乜驚喜。所以揀左Stoke-on-Trent挑戰一下。

可能唔少英國留學生都聽過/去過Stoke-on-Trent，都只係因為距離鼎鼎大名嘅Alton Towers(主題樂園，堅係好玩架)，其中一個最近嘅城市就係Stoke-on-Trent，要去Alton Tower其中一個方法就係由呢度轉接駁巴士。我相信大部分人都唔會停留係呢度，因為呢度嘅市中心同英國其他市中心都係一樣樣。除非你係住係大城市，從來未曾踏足過小鎮，如果唔係Stoke-on-Trent表面上係完全無特別之處。
闖入Stoke-on-Trent前當然要做足準備，睇下有咩搞啦。原來Stoke-on-Trent係世界聞名嘅陶器之都，Wedgwood陶器廠亦設於附近。當日行程：大約11點去到火車站，去市中心搵野食之後再去Wedgwood，夜晚大約六點就各自返屋企。
去到火車站，原來步行去市中心要行十幾分鐘，為左節省時間同腳骨力，決定搭巴士去。因為市中心真係普通到唔普通，所以一張相都無影。睇得出陶器對Stoke-on-Trent嘅重要性，連商場都叫The Potteries。(下圖來自Google Maps)

因為大家都想食英式下午茶，所以較早前已經預約定一間名叫Blondies Twisted Tea Room嘅餐廳。睇到呢度，你可能會話：無野呀嘛，十一點幾去食下午茶? 因為佢地下午3:00 last order，3:30收工。為左達到目的，都無所謂啦。

左：The Dumb Blonde - 自選蛋糕兩件，士多啤梨英式鬆餅，朱古力，糖果

右：The Natural Blonde - 自選蛋糕一件，英式鬆餅，沙律，三文治，Nachos

左下：Lemon Meringue Pie

右下：Victoria Sponge Cake

本來舖內裝飾好靚好色彩繽紛，可能太早起身未訓醒，影左一堆相先發現自己開錯左黑白相機，又懶得再移動去再影過，唔好意思。大家都眼見碟中好多麵粉造嘅食物，所以兩位女子未食完已經好飽。店員都好好人咁幫我地將食物包好同提供紙袋。
食飽又再出發。司機叔叔都好習慣遊客問係邊落車，到站時有提醒我地落車，教我地點行去，再提醒我地幾點鐘有車返回市中心，很有愛。