留意 – 上圖只係目標，與我嘅製成品有點出入，仲要有少少醜。
作為一個不能自拔地迷上KPOP嘅人，當然間唔中會被韓劇中嘅食物吸引啦。可惜韓式食物無論係香港還是係外國食價錢我都會覺得比較貴，係外國都唔係度度都有得食。要解決對食物嘅渴望唯有自己落手落腳整！
唔想整個假期留係宿舍，得知有朋友肯借出地方比自己屈蛇就即時尋找最便宜嘅方式去朋友度了，所以今個假期由寄人籬下開始！
多得朋友家中有一隻正常嘅平底鑊，所以今次嘅海鮮煎餅唔痴底又落少好多油。只係缺乏經驗所以有少少燶，不過一次半次食唔死嘅...可能睇龍咁威睇得太多次，鄭中基煮咖哩會唱印度歌，我都會邊煎餅邊聽/唱KPOP。
材料：泡菜、海鮮一盒、麵粉(一個飯碗咁多，另外留番少少撈蔥)、水一個飯碗咁多、蔥一札、蛋一隻、調味料(糖、鹽)
麵粉 - 其實求奇係超市買包平平地嘅已經可以，韓唔韓文應該無乜分別。
蔥 - 切段，大約3厘米長，落麵粉，盡量每條都要沾上麵粉。
泡菜 - 應該大部份中超都有得賣，事前先切碎成手指頭咁大。建議遲少少先切泡菜事關會好多泡菜水。我個人喜歡食泡菜所以落左半包，不過都係隨自己喜歡啦。
調味料 - 用番你用開嘅鹽同糖...你喜歡可以落咖哩粉孜然粉都可以，出黎咩味我就唔知喇...
海鮮 - 唔好意思影錯左另一盒...我用果盒入面有魷魚、蝦、縮水青口。
先開好粉漿，麵粉加入水攪均，再加入蛋攪均。攪均後大約custard咁杰嘅液體，唔夠水先再加。
加入調味料同海鮮，唔好攪太長時間，均勻就可以停。
開火落油炒蔥 - 最大可以開到6，我開到4；炒到變黃金色，須時大約4分鐘吧，時不時反下佢黎睇下。
平均分配蔥係鑊中，再慢慢倒入粉漿；唔好好似圖中咁只係倒向一個位置，否則蔥會被推去外圍。
倒完。
大約5-10分鐘後，見到金黃就可以反轉。因為海鮮比較多，所以好易散，我將塊餅慢慢從鑊中「冼」去碟上再反轉倒返落鑊。
我D蔥炒過龍...有待改進。
又煎到金黃色就食得！不過我當時有少少餓，太心急倒散左塊餅。
味道係可以嘅，不過唔夠出面食嘅香口，始終落少左油嘛。
唔知大家有咩意見呢?
No comments:
Post a Comment