童年回憶 – Xanga

仲會用自己帳戶黎登入呢個頁面而見到呢篇文嘅朋友，你地同Xanga嘅交情應該唔淺吧？當朋友聽到我仲用緊，多數得到嘅回應都係「下！你仲用緊架原來？」「我都好耐無入過嚕…」「咁old school嘅你？」甚至係「Xanga仲存在架？」

我大約九年前開始用Xanga，大家都開始識用電腦，識用埋Xanga當然係更「潮」嘅表現啦，要證明自己係電腦高手或者潮流尖端嘛，小學雞就係咁…

為左一個頁面，我都唔知自己曾經花左幾多時間。

1) 每日一篇：內容大致都係講述每一日每一堂發生過咩事。間唔中會有感性特輯，打堆懶成熟嘅野再加兩句歌詞；又間唔中有憤世特輯，用加大紅字黎鬧/咀咒某同學。那些年，我仲係六年級。
大約中二時，到左比較反叛(有少少不知所謂) 嘅年紀，不能夠接受自己曾經打過幾年同行程表無分別嘅日記而開左個新嘅，希望洗脫過去嘅Kai味。可惜當年我對「唔Kai」嘅定義就係「懶抑鬱、打歌詞、書面語」。如果內容正常，文筆還可以的話其實係無問題嘅。但剛才去舊Xanga睇番，我只可以話我對唔住過去嘅自己，我起左雞皮…當年打嘅野真係九唔搭八。
2) 學識打中文字：由小學到宜家我都仲係覺得中文先係最傳神，最能夠表達自己。但當年被倉頡/速成要用到二十幾粒制嚇走，走去用只須十粒制嘅九方打中文字。我有自信果陣嘅自己(小學生黎講) 算打得幾快架…後來洗左機，九方一併消失，所以先學打速成。Xanga都算係令我走去學打中文字嘅原因。
3) 學識基本html：除左文字內容，外貌亦係Xanga重要嘅環節。當時Xanga外貌就代表左一個人喜好、品味；間唔中都要大變身，廢時自己同所謂嘅讀者睇厭嘛。
只係用Look and Feel改Page Width & Alignment、整走條大剎風景嘅Search Bar、換Background圖片、改字體顏色、加Background Music，識睇字嘅都識整啦。要夠突出夠型嘅話就當然要用到偉大嘅html。


比較基本嘅外框、link由字變圖、轉滑鼠遊標等等，要改到自己滿意為止，可以用到一晚時間。改改下仲改到自己識用少少html，當時真係覺得自己係神童。到中學讀CIT時，就係因為呢樣技能而可以聽少幾課書…
可惜再進階嘅html學極都唔識，只好上網搵黎用啦，甚至睇其他Xanga嘅「原始檔」，將最精要嘅功能都偷去自己Xanga度。比較有用嘅html code莫過於睇foot print(仲要連只入到friend lock果頁都睇到)、自動將文章全Private等等。

家陣要裝飾頁面只可以用Xanga Themes，係幾方便啦又唔洗不停將頁面轉黎轉去，但係就無左以前果種成功感。
不過當年比較空閒嘅學生漸漸長大，學業日漸繁重，加上Facebook為大家提供一個又快又方便嘅平台讓大家極速分享一切，所以大家都離Xanga而去，踏入速食嘅世界。
要係忙碌嘅生活中抽時間同朋友social，Facebook最適合不過。要比全世界人睇就只要上載一張圖片、打一個字、或者字都唔洗打直接share一條片就可以。基本上同沖個杯麵無分別，都係按一個制，只係滑鼠制同熱水制之分。杯麵嘅壞處就係只可以有限地將食物改變，只可以控制嘅只係將個杯麵浸幾耐；係facebook你就只可以上載一句句子/一幅圖/一條片，然後就會facebook自動用佢嘅模式貼上你嘅wall/其他人news feed上。
當一個人類食得太多杯麵，都會想食下唔只用滾水浸出黎嘅食物吧。從即食食品中賺左時間，但忽略左自己對食物嘅要求，輸左健康。從facebook中賺到時間，同時又失去左咩呢?除左網上同食物，生活上都總有一些事情值得花多少少時間去思考吧。還是「速度」真係最重要？
要回憶嘅其實唔係呢個網頁，而係當年為呢個頁面瘋癲嘅日子，為自己嘅小世界而付出嘅精神。唔係最靚唔係最潮，自己滿意就可以。

題外話：以前成日見到朋友subscribe疑似周杰倫、阿Sa、阿嬌仲有黃夏蕙嘅Xanga，其實係唔係真架？