留學生亂咁遊 - 巴塞隆拿 DAY1-2

係英國，每日都望住個天祈求冬天走快少少，唔需要每日穿著厚疊疊嘅衫。等到頸都長埋，終於離開又大風又凍嘅英國，黎到巴塞隆拿率先感受下夏天嘅熱力。


由3:20am出發搭Megabus，去到Manchester轉的士去機場，乘搭7:45am Jet2航班到Barcelona。心入面缺少左一份雀躍，只有三個字﹣「好眼訓」。無辦法，要平就要付出代價，全日行屍走肉般四圍走；經過好多去過Barcelona嘅朋友不停地警告，又要留低少少力保護身上財物，好眼訓呀。

其實Jet2座位都幾闊，椅背比較薄亦都較硬，兩個鐘就算吧啦
對比起飛機內部係黃色嘅Ryanair，Jet2真係算舒服

去到巴塞隆拿，搵hostel迷路，又白白浪費左個幾鐘+腳骨力+臂力，真失敗。折騰一番後，終於出發去最近嘅景點LA Rambla。沿途有博物館、好多人、餐廳、店舖同都係好多人。

受到又餓又眼訓嘅狀態影響，亂衝左入一間位於旅遊區LA Rambla嘅餐廳，圖中嘅Paella還算放得入口，但係另外叫嘅Mediterranean Salad真係太差，差到相都無影﹣罐頭粟米、罐頭吞拿魚、唔新鮮嘅生菜、生毛嘅不知名蔬菜一條，仲要賣€9.95未加一，中伏

位於LA Rambla的Mercat de la Boqueria - 著名market，有大量水果，亦有肉類、蔬菜等等食物。環境好乾淨，market氣氛不錯。個人認為因為呢度係旅遊區所以比較貴，不過仍然人頭湧湧

為免再次被騙，第二日我地都係去左一間遠離旅遊區嘅超市。暫時係巴塞隆拿未有發現大形超市，入左好多間都只有乾糧同少量蔬菜。下圖呢間算係齊全。如果唔係luggage allowance有限，我都有考慮過買樽栗子果醬返去。

係超市見到大量醬，又求其揀左兩樽睇唔明嘅醬。後來上網搵番，原來右圖嘅Paté de Foie係豬肝醬，左圖個罐已被放進垃圾桶所以不知名，其實兩罐食落都係似咸牛肉(約€2)

為左食醬而買嘅餅乾：芝士味(左)，番茄味(右)
每包約€1.5 其實唔點醬都好好食

橙朱古力餅，每塊約4cm直徑，橙味朱古力包住一塊比消化餅脆同薄嘅餅乾，好好味:P

除左食之外，仲去左Park Güell - 由Antoni Gaudi i Cornet(高迪)設計，作品仲有都係位於巴塞隆拿嘅聖家堂。

(上) Park Güell到處都有人演奏音樂，部分仲有擺放CD售賣。好型

(下）係Park Güell可以睇到巴塞隆拿全景！

當然要付出代價嘅，就係要行上下圖呢座野先睇得最清楚，但係上面真係好多人，有些少危險咁啦。

今日總結：要係自己餓到垂死之前搵定食物，否則會容易墮入旅遊區陷阱。