經過不停徒步遊覽巴塞隆拿嘅兩日，我同朋友都決定要善用張T10 (預付十程metro嘅交通卡)，打算到比較遠嘅聖家堂Sagrada Família，同其他景點。
首先一大清早應該食一個早餐。雖然早餐非常普通：煎蛋兩隻、煙肉三條、多士一塊、橙汁一杯；但係比起第一日那碟Mediterranean Salad食得開心好多。事關雞蛋煎至金黃色但中間蛋白未煎至全熟，外面微脆裡面滑；煙肉唔似得英國果啲乾硬化嘅煙肉，仲食得出係豬肉；橙汁仲要係鮮搾。Mediterranean Salad之後，竟然搵到一份簡單而有誠意嘅早餐，其實已經好滿足啦。大家可能會覺得我有少少誇張，但係我當日心情就是如此感動。
可能係星期六嘅關係，真係好好好多人，一去到就見到遊客包圍左聖家堂一圈。雖然外表確實係非常壯觀，但係我地都選擇唔入去，環繞聖家堂一周影下相就算，唔想俾€13.50入去逼嘛。其實真係想離遠影相都有難度，因為連對面馬路都充斥住人；加上其實聖家堂仲未完成興建，四周圍都包住一塊塊布同棚架，真難搞。
由於手上只有一部款式勁舊嘅相機同手機，想影聖家堂全景其實係不太有可能，唯有影幾幅再合併，為自己係聖家堂留下腳毛作一個紀念吧。
難得使用左一次T10 quota但係又無入去聖家堂，當然要再四圍行下。聖家堂背後有一座頗美觀嘅建築物呢，似乎唔係景點，無開放給予遊人參觀。
離遠望完聖家堂之後，就 開始又搵食物。Tapas係西班牙必食嘅食物，唔可以再中伏！幸好去到LA Rambla附近搵到一間唔錯嘅餐廳，價錢亦都比其他餐廳相宜一點點。
左上：煙三文魚, 牛油, 脆麵包
左下：紅椒包住疑似Mozzarella芝士
右上：Grilled Vegetables，紅椒焗到好甜，好味！
右下：BBQ Sauce Chicken
，雖然無BBQ醬味，但係另一種帶有少少騷味嘅包係雞肉上面都唔錯。用作伴碟嘅絲狀薯條比較少見，放置一段時間仍然脆身，最後被清光
Shopping
衣著品牌ZARA來自西班牙，係巴塞隆拿都會見到唔少ZARA同其他姊妹品牌嘅蹤影。Catalunya係巴塞隆拿著名購物嘅好地方，除左商場El Corte Inglés、El Triangle、Sfera之外，仲有充斥著大量服裝店嘅購物大道Rambla de Catalunya。我地當然都唔執輸去參觀一下啦。
發現兩件印有中文字嘅T-shirt，令我係ZARA嘅購物慾大減。
見到大商場，我地腦入面「應該有超級市場」嘅想法，然後就衝左入去El Corte Inglés。終於遇到真正嘅超市，肉醬比起外面仲要平！
無錯！我地又係買醬搽餅食 (€0.72)，平過上之一半有多！
Lindt士多啤梨黑朱古力 - 好香士多啤梨味！
No comments:
Post a Comment