留學生亂咁遊 - 巴塞隆拿 DAY4

經過三日無止境地拒絕搭地鐵同徒步去不同景點，雙腿係時候休息一下，去到巴塞隆拿嘅重點 — 沙灘。又係果句，真係好多人，不過大家都非常安靜(諗返轉頭其實可能係因為大家都曬緊太陽，無必要發出聲音。去旅行時腦袋總會理想化眼前事物)。


出發到沙灘前，先到我稱之為「避風塘」嘅南邊遊盪。呢度有戲院、商場、餐廳、水族館，如果黎到海邊但係唔想吹風或曬太陽嘅旅客都可以留係南邊。

因為搵唔到吸引嘅餐廳食早餐，只好食雪糕+Waffle :P

  若然想吹海風又唔想落沙灘，有位置讓人躺下曬一陣太陽，好設計

沿著海邊一路向北行，就見到夢寐以求嘅沙灘！因為氣候唔潮濕，加上有微風，赤腳走落沙灘都唔怕痴住啲沙，用手摸就更加無問題；所以唔少人毫無準備下就走落沙灘曬太陽。我地目擊兩個西裝男直接將上衣脫掉脫掉就躺上沙灘(好似係下圖右邊果個背脊)，正。

乾曬一個小時後，又係時候醫肚。一路沿著海邊向北行有非常多餐廳，因為唔想中遊客伏，所以最後膚淺地以外貌選擇左一間食burger嘅餐廳，唔食得都睇得嘛。

走懷舊風嘅桌椅 - 食環境＞食味道

有趣Menu設計 - 事實證明只要你肯花少少心機包裝一下，就會吸引到人(只少吸引到我)

左上：Mr. Nice Guy - Vegetarian Burger，用鷹嘴豆代替肉，仲有牛油果、蕃茄等等蔬菜，加上辣醬汁，味道係幾清新啦
左下：原條連皮新鮮炸嘅薯條！唔會好似麥X奴咁軟淋淋，好食
右上：The Brunch - 用菠菜奄列代替肉，加上磨菇、芝士、茄汁等等東西，真係成個早餐咁
右下：Caribbean Chicken Salad - 除左一般沙律菜之外，仲有牛油果、橄欖、番茄、蜜糖芥末醬。好足料，好多雞肉！

食飽後又繼續步行，途中有好幾個小碼頭，揀左一個行出去⋯⋯其實有條繩圍住左，又有個牌疑似寫住不得前進，但係又唔肯定牌上文字意思，外面又咁多人，都係走左出去

幾多人唔怕死，係崖邊睇書、影相、靜坐，另一邊仲有人彈結他同踩單車。

幾多年無見過如此乾淨、遼闊嘅海？儘管呢度唔係世界上最美麗嘅海，但我暫時已經滿足

 
駁相駁上腦 -  見到一撻黑色不用驚慌，只係因為我將朋友嘅樣貌打朦左

直到沙灘盡頭，變左個疑似商業區，完結左悠閒嘅一日。巴塞隆拿亦都就此完結。雖然巴塞隆拿充滿住遊客同設計俾遊客嘅伏，本應係美麗嘅Park Guell、海灘、聖家堂都被人潮淹沒，但係無遊客就唔會有一個如此發達嘅巴塞隆拿，唯有接受呢一點點嘅遺憾吧。
除左景點之外，四周嘅音樂表演都值得欣賞！我只從遠處偷偷拍低左三張表演者嘅照片，因為唔想正面騷擾佢地同觀眾嘛⋯⋯

於Metro站連接月台嘅長走廊都有劃分指定位置給予音樂家表演。西班牙對於保護本地文化絕對有努力過，希望呢個情境有一日都會係香港出現啦。