留學生亂咁遊 – Marrakech

Marrakech對兩個唔夠大膽，又唔夠疏爽嘅女生黎講，是一個伏。結果四日都活在惶恐之中。事後問返其他去過Marrakech嘅朋友，都認為如果有男生陪伴/識法文係會比較有安全感。

你可能會問：點解兩個女仔去旅行要揀個咁奇怪嘅國家？
上年去旅行時，極渴望一間酒店(而唔係hostel)。可惜大多酒店都比較貴，hostel又唔係唔住得人。直至我嘅朋友從網上得知世界上有個位於摩洛哥地方叫Marrakech，酒店又平又靚！Marrakech酒店價錢平過其他城市嘅hostel價錢。我地就咁被金錢蒙蔽了雙眼⋯⋯



貨幣摩洛哥用嘅貨幣係Moroccan Dirham (Dh)，一蚊港幣大約等於1.09Dh，計數就幾方便啦。原來摩洛哥嘅貨幣唔可以帶出/入，所以遊客區都接受歐元，我地都係去到當地機場先搵兌換店換錢。

酒店天台 - 幾耐未試過天台望出去係無建築物遮擋嘅？

天氣相對當時仲落緊雪同落緊冰雹嘅英國，摩洛哥真係好熱。加上建築物高度都被規限(根據維基百科，好似話唔可以高過一棵棕櫚樹，咁求奇？)，好多時太陽都係直曬落頭頂。從網上得知摩洛哥為伊斯蘭國家，網友都建議遊客著長袖衫，第一日我地都好聽話⋯⋯然後發現當地有遊客著背心+短褲，就放棄聽話了。

的士伏一步出機場，因為完全語言不通，所以搵左架的士去酒店。的士司機們係有夾過架 – 當我地問完價錢之後要求平少少，後面幾個司機就走過黎表示呢個係公價。被的士司機㩒住搶都無辦法，但佢竟然係未若車前就搵左個小朋友帶我地路行去酒店，行完果極短嘅路程後，當然我地被要求俾小費。一開始我就拎左衫袋入面嘅歐元俾呀小朋友啦，呀小朋友話要「ticket」，我心諗tic咩野ket？你知唔知自己講緊乜？？然後佢表示「銀仔係俾細路嘅，我要ticket」，噢原來佢要紙幣⋯⋯ 最後酒店職員唔知講左啲咩，總算弄走左呀小朋友。呢度嘅小朋友真邪惡，人仔細細就出黎呃遊客錢。廿幾歲人竟然被一個細路恰，好失敗。

交通
呢度嘅交通又係一大疑難：人、馬、車、單車、電單車、駱駝、驢仔全部共用一條路。其實行出街好驚車死。我地搭的士都發現司機係亂咁穿插，經常停留係兩條行車線中間或者逆線行駛。又或者其實根本就無線。馬同驢仔要同我地一齊食塵，仲要慢慢行，真係慘嘞。

一天團
我地透過酒店報左一個去Ouarzazate嘅一天團，遊覽被立為世界遺產嘅Ksar of Ait-Ben-Haddou同Ouarzazate Cinema Museum。Ksar of Ait-Ben-Haddou係The Mummy、Alexander等等電影嘅拍攝場地，景色係唔錯啦。

由Marrakech去到景點需時大概四小時，司機大哥係車上上映左一齣一路向北。我相信自己返到香港搭亡命小巴都唔會驚。

司機(右) - 由於語言不通，我都唔知佢叫咩名，所以我地叫佢拓海。佢企到咁高都唔驚，證明帶團經驗十足。

係高山上竟然有店舖，呢度邊個會買野？企多陣都腳軟啦。

其實下面兩條路係連住嘅，即係髮夾彎。我地就咁飄移左好多個鐘⋯⋯

圍住座山轉左好多個彎，終於到達Ksar of Ait-Ben-Haddou

行到上去望落黎就係咁樣，好有全人手製嘅感覺。

Ouarzazate Cinema Museum - 發現原來手機有得影全景，唔洗自行駁相 ！入面完全無文字解釋，我望住啲場景都睇唔明呢⋯⋯

Marrakech唔太適宜兩位女生去(除非你真係膽生毛 )，盡可能都帶個男生吧。